Жаңалықтар

Білім беруді интернационалдандыру стратегиясын іске асыру және халықаралық академиялық ынтымақтастықты дамыту аясында біз, университет білім алушылары, Санкт-Петербург қаласында (Ресей Федерациясы) жетекші медициналық жоғары оқу орындарының бірі — Солтүстік-Батыс мемлекеттік медицина университеті И. И. Мечников атындағы базасында академиялық ұтқырлық бағдарламасына қатыстық. Бағдарлама барысында біз «Гепатология (ересектер)» білім беру курсын сәтті меңгердік.

Бағдарламаға «Гастроэнтерология (ересектер, балалар)» мамандығының 2-курс резиденттері — Тасбулатова А. Б. және Базарбай А. С. қатысты. Бұл оқу біз үшін бауыр ауруларын диагностикалау мен емдеу саласындағы теориялық білімімізді кеңейтіп, тереңдетуге, сондай-ақ практикалық дағдыларымызды жетілдіруге берілген бірегей мүмкіндік болды. Біз халықаралық клиникалық ұсынымдармен және пациенттерді жүргізудің заманауи тәсілдерімен таныстық, ал қабылдаушы университеттің жетекші мамандарымен бірге клиникалық талқылаулар мен ғылыми-білім беру іс-шараларына қатысу біз үшін ерекше маңызға ие болды.

Академиялық ұтқырлық бағдарламасының жүзеге асырылуы университетіміз студенттерінің жоғары дайындық деңгейін және білім беру үдерісінің халықаралық стандарттарға бағдарланғанын көрсетеді. Осындай бастамалар бәсекеге қабілетті мамандарды қалыптастыруға, шетелдік серіктестермен кәсіби байланыстарды нығайтуға және университеттің халықаралық аренадағы академиялық беделін арттыруға ықпал етеді деп сенеміз.

Айта кету керек, бағдарламаға қатысу біздің кәсіби қалыптасуымыздың маңызды кезеңіне айналды. Жетекші медициналық орталықта білім алу, күрделі клиникалық жағдайларды талдауға қатысу және гепатология саласындағы сарапшылармен пікір алмасу бізге пациенттерді диагностикалау мен емдеудің жаңа қырларын көруге мүмкіндік берді. Алған біліміміз бен тәжірибемізді алдағы клиникалық тәжірибеде белсенді түрде қолдануды жоспарлап отырмыз, бұл, сөзсіз, көрсетілетін медициналық көмектің сапасын арттыруға ықпал етеді.

Біз «КМУ» КеАҚ басқарма төрағасы – ректоры Кошерова Бақыт Нұрғалиевнаға, ішкі аурулар кафедрасының меңгерушісі, профессор Ларюшина Елена Михайловнаға, «КМУ» КеАҚ халықаралық бөліміне, Резидентура және кәсіби даму мектебіне, сондай-ақ И. И. Мечников атындағы Солтүстік-Батыс мемлекеттік медицина университетінің профессорлық-оқытушылық құрамына және халықаралық бөліміне жоғары деңгейдегі ұйымдастыру жұмыстары, қолдау көрсеткені және кәсіби әрі академиялық өсуге мүмкіндік жасағаны үшін шынайы алғысымызды білдіреміз.