Ұлы Отан соғысындағы Жеңістің 69 жылдығы қарсаңында Қарағанды мемлекеттік медицина университетінде ардагерлерге құрмет көрсетілді.

Бұл – ҚММУ қабырғасында игі дәстүрге айналған айтулы шара. Жыл сайын 9 мамыр – Жеңіс мерекесі қарсаңында университет алаңында әскери палатка құрылып, солдат ботқасы пісіріледі, соғыс кезіндегі жорық әндері шырқалып, ардагерлерге құрмет көрсетіледі.

Ардагерлер жорық қазанында пісірілген ботқадан дәм татып, соғыс әндерін сүйсіне тыңдады. Өздеріне көрсетілген сый-құрметке ерекше толқып, көздеріне жас алды. Өткен күннің ауыртпалықтарын тебірене еске алып, жиналған жастарға әсерлі тілмен әңгімелеп берді.

  Салтанатты шара университетке саяхат жасаумен басталды. Ардагерлер Қарағанды мемлекеттік медицина университетінің бүгінгі келбеті қалай құлпырып кеткеніне қайран қалып, шынайы ризалықтарын білдірді. Олар оқу кабинеттері мен аудиторияларды қызыға аралап көрді. Студент жастар ардагерлерге алқызыл гүл шоқтарын тапсырды.

Содан кейін ардагерлер осы шараға арнайы құрылған әскери палаткаға келді. Стол басына ардагерлер мен олардың шәкірттері, университет басшылығы жайғасты. ҚММУ ректоры Раушан Сұлтанқызы Досмағамбетова ардагерлерге деген шынайы лебізін білдіріп, оларға зор денсаулық пен ұзақ өмір тіледі. Ал ҚММУ Ардагерлер кеңесінің төрағасы Сенбек Әбдірахманұлы Сартабаев келесі жылы Ұлы Жеңістің 70 жылдық мерейтойына осы құраммен осындай айтулы шараға жиналуды тілейтінін айтты. ҚММУ өнерпаздары хоры орындаған «Катюша» мен «День победы» әндері шаттықты кешті шалқытып жіберді.

  Өз кезегінде ардагерлер де көңіл төрінде жүрген естеліктерімен бөлісті. Владимир Петрович Ророкин соғыс жылдарында жастардың тез есейгенін айтса, бүгінде 90 жасқа толғалы отырған Екатерина Петровна Сприндис елімізге ашық аспан тілеп, ректорат пен  ҚММУ Ардагерлер кеңесінің атына әжелік көңілінен шыққан шынайы алғысын жеткізді. Ал  Құсни Әменұлы Елеуов жас ұрпаққа жарқын болашақ тілей келіп, келешекте өз істерінің білгір мамандары болуына ақ батасын берді.

  Бір сөзбен айтқанда, бұл тәрбиелік маңызы зор айтулы шара болды.