ҚММУ қазақ тілі апталығы
Тәуелсіздік күніне орай, 2015 жылдың 7 желтоқсан және 11 желтоқсан аралағында дәстүрлі түрде кең масштабта өткізілген «Медицина білімі – мемлекеттік тіл аясында» апталығы университет оқытушылары мен студенттері, қызметкерлері үшін көптеген жақсы іс-шараларға толы болды.
Аптаның бірінші қызу жұмыс күні университетімізге кірген сәттен бастап керемет көңіл-күй сыйлайтын патриоттық музыка естіліп жатты, домбыра оркестрі күмбірлеген күйімен университет қызметкерлері мен студенттерін қарсы алды. Студенттердің назарына 1-қабаттың холында мемлекеттік тілде жарық көрген оқулықтар мен көркем әдебиет көрмесі ұсынылды. Аптаның бірінші күнінен «Таза тіл!» атты акциясы жарияланып, университет қызметкерлері мен студенттердің кеудесіне тағылатын белгілік эмблемалар таратылды.
Және де оқу процесіндегі туындап жататын өзекті мәселелерді ортаға салып, өзіндік шешім табу үшін студенттер қауымы мен оқытушылар арасында пікірталас туындатқан «Медицина бағытындағы қазақ лингвистикасының өзекті мәселелері» тақырыбында өткізілген дөңгелек үстелі де жоғары дәрежеде өтті.
Бейсенбі күні факультеттер арасында «Алтын сандық» зияткерлік ойыны аптаның кезекті іс-шарасының жалғасы болды. Еліміздің тарихын, бүгінгісі мен мәдениетін еске түсіріп, ой қозғалттырған бұл сайыс Жалпы медицина және стоматология факультеті командасының жеңісімен аяқталды.
Жұма «Қазақ тілі-тұғырым» атты мерекелік концертімен қазақ тілі апталығының қорытынды күні болды. Көрермен назарына бір апта бойы өткен іс-шаралар видеобейне арқылы көрсетілді.